Нүүр

Nokia хэрэглэгчидийн дунд рингтон бүтээх уралдаан зарлажээ

2011-09-07T07:03:28Z

Таны чихэнд ямар утасны рингтон хамгийн танил байдаг вэ?. Манай улсад гар утас орж ирсэн цагаас авхуулаад өдийг хүртэл өргөн хэрэглээтэй байдаг утас бол яахын араггүй Nokia юм. Тийм дээ ч Nokia гар утасны рингтонууд дотон бөгөөд зарим хүмүүст залхмаар сэтгэгдэл төрүүлдэг нь дамжиггүй юм. 1994 оноос эхлэн гар утасны зах зээлд Nokia брэндээ танилцуулж ирсэн, Nokia компани шинээр гарах гар утсандаа зориулж 10,000$ шагналийн сантай гар утасны ая хийх уралдаан зарласан байна. Уралдаанд түрүүлсэн аяыг 2012 оны утаснуудад рингтон болгон ашиглаж худалдаалах юм байна. Бид нарт ч чадахгүй гэх зүйл юу байна? Үзээд алдахад буруудахгүй л байх амжилт!.

Боулингийн бөмбөг дээрх зомби толгой

2011-09-06T08:09:16Z

Та боулинг тоглох дуртай юу? Бөмбөг нь зомбигийн дүрстэй байвал ямар вэ? мэдээж хэсэг хүмүүст таалагдаж зарим хүмүүст таалагдахгүй айх байх. Германы "13th Street" телевиз нэгэн сонирхолтой рекламыг бүтээжээ. Энэ нь боулингийн бөмбөг дээр зомбинуудын толгойг өвөрмөцөөр урласан байна. Энэхүү бүтээлийг Oliver Paass(spraygun) шүршиж урлажээ.

Google Images шинэчилэл

2011-06-16T06:42:47Z

Хайлтын системийн мангас Google.com бас нэгэн шинэчилэлийг хийжээ. Энэ удаад зураг тусгайлан хайлт хийдэг images.google.com сайтаа илүү боловсронгүй хөгжүүлсэн байна.

Бид зураг хайхдаа зурагныхаа нэрийг бичдэг байсан бол энэ шинэчилэлээр зурагнаас зурагны хооронд хайдаг болжээ. Тодруулбал та өөрт байгаа зургаа "Google Images" -руу ороод фото аппаратны зураг дээр дарж сонгон (компьютерээс хуулах эсвэл URL зааж өгөх сонголттой) хуулна. Хуулж дууссаны дараа таны зурагтай ижил зургийн илэрцийг танд үзүүлэх болно. Мөн энэ хайлтыг ашиглаж өөрт байгаа түгээмэл алдартай зурагныхаа нэрийн мэдэхгүй бол танд хайлтын нүдэнд тухайн зурагны нэрийг харуулах болно. Энэ үйлчилгээ нь хайлтын системд анхдагч биш бөгөөд бас нэгэн зураг хайгч сайт "tineye.com" вэб сайт энэ үйлчилгээг өмнө нь үзүүлдэг байсан билээ.

LCD LED Зурагттай үнээний фэрм

2010-10-27T04:57:29Z

Нашенски нэртэй орсын үнээний сүүний фэрм бусад фэрмүүдээс илүү хангамж сайтай болжээ. Бүх үнээнүүдээ барга л хүнээс илүү халамжилж байна. Бүгдэд нь LCD LED зурагт ийг хашааныхан дээр зоож өгсөн байна. Хүн этгэхэд бэрх л юм гэхдээ та дэлгэрэнгүйгээс зургуудыг үзээрэй. Магадгүй үнээнүүд одоо LCD зурагттай болсон юм чин фэрмийн эзнэн удахгүй XBOX эсвэл PlayStation тоглоом тавьж тоглуулах байлгүй хэ хэ.

ICT Expo 2010-ын онцгой хэсгүүд

2010-05-16T11:08:37Z

Үзэсгэлэнг үзэж амжаагүй хүмүүстээ зориулаад хамгийн онцгой хэсгүүдийг нь тайлбарын хамт бэлтгэн хүргэж байна.

Үзэсгэлэнг зохион байгуулагчид нилээд их бэлдсэн нь олон зүйл дээрээс харагдаж байна лээ. Үүний нэг нь ирсэн зочдыг хөгжөөх үүднээс төрөл бүрийн хамтлаг дуучид ая дуугаа өргөж байснаас харагдана. Намайг тэнэж явах үед "3 охин" хамтлаг доргио дуу болох "Дачхүү"-ээ дуулж байгаа нь таарсан юм. Үзэсгэлэнг үзэж байсан бүх хүмүүс л тойрч үзсэн дээ.

Үзэсгэлэн дээр болсон амттай арга хэмжээний нэг нь Цахим Спортын аварга шалгаруулах тэмцээн юм. Намайг очих үед WarCraft-ийн тэмцээн үргэлжилж байв. Маргааш финалын тоглолтууд болох бөгөөд КТ сэтгүүл нь мэдээллийн ивээн тэтгэгчийн хувьд маргааш очиж Tekken-ийн бичлэгийг хийж сайт болон сэтгүүлийн DVD дээр байрлуулах болно. Мастеруудын тоглож байгааг харахад маш гоё байдгийг эс мэдэх биш.
Энэ удаад дандаа 1 хүний тоглолт бүхий төрлүүдийг сонгосон байналээ. Үүнд: FIFA 10, Tekken (Sony PlayStation 3 дээр), Warcraft: Frozen Throne, өөр юу билээ нэг тоглоом байсан. Тэмцээн зохион байгуулалтын маш өндөр төвшинд болж байсныг хэлэх нь зүйтэй байх.

Дэлхийд монголын нэрийг гаргах бүтээгдэхүүнийг та харж байна. Баахан ангилал гаргачихсан болохоор сайн учрыг нь ч олсонгүй. Санаж байгаагаас NationMate, WorkMate юу ч юу ч билээ. Анх гаргаж байж ийм олон ангилал гаргах хэрэг байсан л юм байх даа. Тухайн үед MGM брэнд бас л Начин,Заан гээд л өчнөөн төрөл гаргаж байсансан. Миний бодлоор маш ойлгомжтой буюу 3-хан ангилал гаргасан байхад л хангалттай юм шиг. Vista үйлдлийн систем бас 7 төрөл гаргаад хүмүүс учрыг нь олохгүй баахан шүүмжлэл дагуулж байсан юм. За тэр ч яахав. Ер нь бол Могул компьютерийг харахад Dell-эрхүү юмуу даа. Хар өнгөтэй, нилээн чанартай байрын case-тэй юм билээ. Өнгө зүс нь ч гэсэн тун дажгүй. Гэхдээ доторхыг нь ямар эдэлж үзсэн биш дээ. Хэдэн сарын дараачаас л хүмүүсээс сураг гарах байх.

Ямар ч үзэсгэлэн дээр үзэсгэлэнт охид л чимэг болдогсон. Ноднин жил Unitel-ийн охид маш онцгой харагдаж байсан бол энэ жил Могулын охид аргагүй хараа булааж байлаа. Могул нэртэй нөүтбүүкийг та харж байна. Их жижигхэн юм билээ. Бараг л нэтбүүк юм болов уу. Экспод маань өнгө зүс нэмэн орж ирсэн Могул брэнд болон охидод нь баярласан талархсанаа илэрхийлье. (Зарим компанийн охид зураг авах гэхээр бушуухан зугтаадгийг эзэд нь мэддэг болов уу!)

Монголд төдийгүй дэлхийд хүчээ авч эхлээд буй E-Reader төхөөрөмж. Монгол контент компани нь ийм дижитал төхөөрөмж болоод компьютер дээр унших зориулалт бүхий ном сонин сэтгүүлийг борлуулах төсөл хэрэгжүүлж эхлээд байгаа. Хэрвээ та book.gogo.mn сайт руу орвол КТ сэтгүүлийн сүүлийн 2 дугаар байгааг харж болно.

iRiver төхөөрөмж дээр КТ сэтгүүлийн нийтлэл иймэрхүү л харагддаж байна даа. Дижитал уншигч маань хөгжлийнхөө эхэн үед байгаа болохоор хар цагаан дэлгэцтэй юм билээ. Яг сэтгүүл шиг харуулж бас хараахан чадахгүй байгаа. Тэжээл, татах хурд энээ тэрээ гээд бэрхшээлүүд байгаа биз дээ. Нэг, хоёр жилийн дараа тансаг болох байх. Гэхдээ ном уншихад бол ямар ч асуудалгүй юм билээ. Бараг жинхэнэ номоосоо ч илүү байж магадгүй.

Мэдээлэл Холбооны Сүлжээ ТӨК маань энэхүү машиныг ивээн тэтгэдэг бололтой. Өөрийн мэдлийн павильондоо энэхүү 69-ийг байрлуулаад орхисон байв. Ямар нэгэн хүн амьтан, хэвлэмэл материал байсангүй. Гэхдээ 69 их гоё харагдаж байна лээ. Та арын хэсгийг хараач. Шатахуун хийдэг банк шууд байгаа юмуу даа.

Юнитель компани хамгийн сайхан байрлал дээр байсан бөгөөд мундаг урт дэлгэц байрлуулсныг та харж байна. Тэр нь дугуйрсан маягтай. Үнэндээ хийхэд хэцүү шийдэл шүү дээ. Анх хийх гээд угсарч байхад нь би ямар дүрс явуулах бол доо гэдэг дээр хамгийн их сонирхож байсан юм. Та иймэрхүү дэлгэцийн шийдлийг Америкийн сагсан бөмбөгийн тоглолтын талбайн дээгүүр болон хөлбөмбөгийн талбай дээрээс харж болно. Харин Юнитель маань зүгээр л нэг хээ хөдөлгөөд байсан юм. Гэхдээ би хэсэгхэн хугацаанд л харсан л даа. Хэрвээ хээнээс өөр юм гаргаж чадаагүй бол туршлага дутсан байх л даа.

"Миний мэдэх мэдээллийн технологи" уралдаан болсныг та мэдсэн байж магадгүй. Тэгвэл энэ бол бага насны хүүхдүүдийн ангилалд түрүүлсэн зураг юм. Яг голд нь байгаа зураг. Аав, ээж, өөрийгөө компьютераар дүрсэлсэн санаатай гэсэн.

Дунд насныхны ангилалд түрүүлсэн зураг нь голд харагдаж байна. Үнэхээр сайн зурсан, хөдөлмөр ч их орсон зураг байна лээ. Санаа нь орчин үеийн хүүхдүүд том дэлгэц дээр усан доорх ертөнцийг харж байгаа юм уу даа. Ялангуяа хар фонтой зурсан нь бусад зургуудаас шууд ялгаруулж байна лээ.

Ахлах насныхны зураг. Гартаа нөүтбүүк атгасан эр Surfing хийж байгаа зураг. Яг ямар утга учиртайг та өөрөө тааж мэдээрэй.

Нээрээ эцэст нь хэлэхэд энэ удаагийн үзэсгэлэнд Мобиком, BSB (ер нь орж байл уу?!?) гэх мэт зарим томоохон компаниуд огт ороогүй байна лээ.

ICT Expo 2010 дээр компаниуд тохижилтоо хийсний дараа

2010-05-15T16:00:00Z

Өмнө хэлсэн ёсоор Экспо үзэсгэлэнд оролцсон компаниудын тохижилтын ажил хэрхэн хийгдсэнийг танд харуулахыг хүслээ.
Ер нь жилийн жилд компаниуд их сайхан оролцдог. Тэр тусмаа томхон компаниуд мундаг мундаг тохижилт хийдгийг очиж үзсэн хүмүүс бүгд мэдэх биз ээ.

Ингээд 2 өдрийн өмнөх болоод дараах байдлыг та зургаас харна уу.

{yoogallery src=[/images/stories/undsen_bulan/niitlel/expo_2010_02]}

Expo 2010 ба Нээлтийн өмнөх зургууд

2010-05-14T03:23:15Z

Их нээлтийн өмнө компаниуд ямаршуухан байгаа вэ?
Бүгд л засварын болоод тохижилтын ажил хийж байгаа харагдана лээ.

Ялангуяа томхон аж ахуйн нэгжүүд нүсэр тохижилт хийдгийг бид мэднэ шүү дээ. Тэдний Өмнө/Дараах гэсэн байдлаар зураг авахаар төлөвлөсөн юм.

Ингээд нээлтийн өмнө буюу тохижилтын ажил хэрхэн явагдаж байгааг та харна уу. Энэ бол 5-р сарын 14-ний өглөөний 10 цагийн орчимд авагдсан зургууд юм.

Энэ жил шинэ компьютерийн үйлдвэрийн нээлт хийж байгаа болохоор MCS том орох нь гарцаагүй. Бас G-Mobile ивээн тэтгэж байгаа болохоор үндсэн том талбай дээр засаж байна лээ. Харин Unitel бас л гол гарцан дээр дугуйрсан нүсэр талбай засаж байгааг та харж болно.

Бусад нь бол өөр өөрсдийн хэмжээнд тун дажгүй засаж байгаа харагдсан.

Хэд хоногоос бүрэн тохижсон зургууд тавигдах болно.

{yoogallery src=[/images/stories/undsen_bulan/niitlel/expo_2010_01]}

Цахим спортын үндэсний аварга шалгаруулах тэмцээн 2010

2010-05-07T07:47:27Z

Мэдээллийн технологийн хөгжил хүмүүсийн амьдралд олон талын боломжууд, амьдралын шинэ хэв маягуудыг бий болгож байна. Үүний нэгэн илрэл бол энгийн компьютерийн тоглоом өөрийн хөгжлийн явцад олонд хүлээн зөвшөөрөгдсөн Спорт болон хөгжиж байна. Үүний тод жишээ нь Азийн заалны спортын төрөлд албан ёсоор нэр бүхий тоглоомууд орсон бөгөөд цаашид Олимпын төрөлд албан ёсоор оруулах талаар хэлэлцэгдэж байна.

Манай орны хүүхэд, залуус кибер спортын талаар цаашид багагүй амжилт гаргах ирээдүй байгаа нь Азийн спортын төрөлд амжилттай оролцсон түүхээс харагдаж байна.

Электрон спорт хөгжихөд тус газраас хэрэгжүүлсэн компьютержуулалт хөтөлбөр, өрх бүрт интернэт хөтөлбөр тодорхой хэмжээний түлхэц өгсөн. Цаашид кибер спорт, мултимедиа, интернэтийн зүй зохистой хэрэглээг бий болгоход 2001 оны 5-р сарын 14-17-ны хооронд Мишээл Экспо үзэсгэлэнгийн танхимд зохиогдох гэж байгаа Электрон спортын үндэсний аварга шалгаруулах тэмцээн 2010 арга хэмжээ томоохон түлхэц өгнө хэмээн үзэж байна. Уг тэмцээн нь 2 дахь жилдээ уламжлал болон зохион байгуулагдаж байгаа билээ.

Мөн кибер спортыг олон нийт, хүүхэд залууст зөвөөр сурталчлан таниулснаар кибер спортыг сонирхогчдын хүрээ нэмэгдэх болно. Энэ нь компьютер болон түүний дагалдах хэрэгслүүдийн худалдааг нэмэгдүүлэх ач холбогдолтой.
Тус тэмцээнийг Мэдээлэл, шуудан, харилцаа холбоо, технологийн газар, Монголын электрон спортын холбоо хамтран зохион байгуулж байгаа юм.

Энэхүү арга хэмжээний үндсэн зорилго нь электрон спорт сонирхогч хүүхэд залуусыг дэмжих, электрон спорт болон компьютерийн тоглоомын талаархи зөв ойлголтыг нийгэм, олон нийтэд бий болгох, электрон спорт болон интернэт тоглоомын орон зай дээр суурилсан бизнесийн үйл ажиллагааг идэвхижүүлэх, цахим спортын ирээдүйн шинэ хандлагыг дэмжих явдал юм.

Уг арга хэмжээг жил бүр зохиогддог, олон нийтийг хамарсан арга хэмжээ болгон хэрэгжүүлэх төлөвлөгөөтэй байгаа бөгөөд энэ жилийн цахим спортын үндэсний аварга шалгаруулах тэмцээн 2010 оны 5 сарын 14-17-ны хооронд Мишээл Экспо төвд зохион байгуулагдана.

Энэ жилийн тэмцээнд персональ компьютерийн төрөлд FIFA 10, Warcraft – Frozen Throne, Trackmania Nations – Forever, Console gaming(X Box)-ийн төрөлд Tekken 6 гэсэн тоглоомуудыг оруулахаар шийдээд байгаа юм байна. Эдгээр тоглоомууд нь 2010 онд болох дэлхийн хэмжээний томоохон фестивалиуд болох WCG 2010, ESWC 2010 наадмуудад мөн албан ёсны төрөл болон сонгогдоод байгаа билээ.
Тэмцээнд оролцох баг тамирчид нь өөрсдийн ивээн тэтгэгч байгууллага хувь хүнтэй байж болох бөгөөд зохион байгуулагчдын зүгээс салбарын аж ахуйн нэгжүүдийг баг тамирчдын албан ёсны ивээн тэтгэгчээр ажиллахыг уриалж байгаа юм байна.

Тэмцээний төрөл бүрт хамгийн шилдэг 16-32 тооны тамирчид оролцох боломжтой. Тоглолт нь тусгай VIP танхимд явагдах бөгөөд хоёр тоглогчийн тоглолтыг өргөн дэлгэцийн том телевизороор танхимд байгаа бүх үзэгчид шууд хүлээн авч үзэх юм. Энэ нь тухайн тоглогчийг ойр дотны хүмүүс болон ивээн тэтгэгчид нь шууд хөгжөөн дэмжих боломжийг олгож байгаа юм.

Тэмцээний үеэр Мэдээлэл, шуудан, харилцаа холбоо, технологийн газар байгууллагуудын дунд дэлхийн хөлбөмбөгийн аварга шалгаруулах тэмцээн болох гэж байгаатай холбогдуулан FIFA10 тоглоомын төрлөөр бооцоот тэмцээн зохион байгуулах бөгөөд нэг байгууллагаас 1-2 тоглогч оролцох боломжтой.

Тоглоомын төрөл бүрт эхний 3 байр шалгаруулж гэрчилгээ, үнэ бүхий зүйлс, мөнгөн шагналаар шагнах юм. Мөн эхний 3 байрт шалгарсан баг тамирчдыг 2010 онд тив, дэлхийн хэмжээний тэмцээнд оролцуулах тал дээр дэмжлэг үзүүлнэ.

Монголын Электрон Спортын Холбооны Тухай:

Монголын электрон спортын холбоо нь 2003 оны 4-р сарын 28-нд байгуулагдсан бөгөөд Монголд электрон спортыг хөгжүүлэх, түүгээр дамжуулан мэдээллийн технологийг олон нийтэд сурталчлан таниулах чиглэлээр үйл ажиллагаа явуулдаг төрийн бус байгууллага юм. Уг холбоо нь байгуулагдсан цагаасаа хойш улсын чанартай томоохон тэмцээнүүдийг зохион байгуулсаар ирсэн бөгөөд эдгээрээс зарим нэгийг дор дурдъя.

2003 онд электрон хөлбөмбөгийн улсын аварга шалгаруулах тэмцээн.
2003 онд Counter-Strike –ийн улсын аварга шалгаруулах тэмцээн.
2004 онд АНУ-ын Сан Франциско хотод болсон WCG 2004 олон улсын электрон спортын наадмын сонгон шалгаруулах тэмцээнийг амжилттай зохион байгуулж улмаар тамирчнаа уг наадамд оролцуулсан.
2005 онд Францын нийслэл Парис хотноо зохиогдсон ESWC 2005 наадмын сонгон шалгаруулалт.
2007 онд Макао улсад болсон Азийн заалны спортын анхдугаар наадамд тамирчдаа оролцуулж алт, мөнгөн медаль хүртэн монголын бусад баг тамирчдаас хамгийн өндөр амжилтыг үзүүлж байсан.
2009 оны 10 сард Вьетнам улсад болсон Азийн заалны спортын наадамд тамирчдаа оролцуулж 1 мөнгө, 1 хүрэл медаль хүртэж байсан.

Аливаа олон нийтийг хамарсан томоохон үйл ажиллагааг зохион байгуулахад ивээн тэтгэгчдийн хувь нэмэр асар их байдаг билээ. 2010 оны электрон спортын үндэсний аварга шалгаруулах тэмцээний ерөнхий ивээн тэтгэгчээр Summit компани ажиллаж байгаа бөгөөд Mobinet болон Мөнгөн бороо компаниуд ивээн тэтгэгчээр, мэдээллийн ивээн тэтгэгчээр NTV, TV5, Дотно ФМ 103.6 болон Компьютер Таймс сэтгүүлүүд ажиллаж байна. Электрон спорт сонирхогч хүүхэд залуучуудыг уг тэмцээнд өргөнөөр оролцохыг зохион байгуулагчдын зүгээс уриалж байгааг дамжуулахад таатай байна.

Бүртгэл болон бусад дэлгэрэнгүй мэдээллийг World Arena интернэт тоглоомын төвийн 319834, 91929984 дугаарын утасуудаар лавлаж болох юм байна.

“Мобиком” корпорацийн ерөнхий захирал Д.Болор: Үнэ цэнээ залуу насандаа л бий болго, тэр чинь мөнгө

2010-05-03T05:07:06Z

Монголчууд "Биеийн бөхөөр ганцыг дийлнэ. Сэтгэлийн бөхөөр мянгыг дийлнэ" хэмээх философитой ард түмэн. Энэхүү үгийн үнэ цэнэ өдгөө ч хэвээр гэдгийг "Мобиком" корпорацийн ерөнхий захирал Д.Болор сануулчихлаа. Даяаршиж буй дэлхийн улс орнууд хувь хүний хурдтай хөгжил бизнесийн стратеги, цагийн менежмент, өрсөлдөх чадвараар хүч үзэж байна. Энэ тухай түүнтэй ийн хөөрөлдлөө.

"Мобиком” корпорацид анх ажилд орж байсан үеэ дурсахгүй юу. Япончууд цагийн менежментээрээ бизнесийн салбарынханд нэр хүндтэй. Тэдний хөрөнгө оруулалттай компанид ажиллахад анх ямар сэтгэгдэл төрж байв?

Манай корпорацийн гурван хөрөнгө оруулагчдын нэг нь “Ньюком” нөгөө хоёр нь Японых. Япон менежмент дэлхийн шилдэг арга барилуудын нэг. Аливаа зүйлд гүнзгий судалгаатай ханддаг, шийдвэрээ маш нухацтай гаргадаг. Нэгэнт гаргасан шийдвэрийнхээ үр дүн гартал араас нь уйгагүй хөөцөлдөж тэмцдэг. Хамгийн гол нь асар их бизнесийн ёс зүйтэй. Өндөр хөгжилтэй орны удирдлагын арга барилаар бид бизнесийн ёс зүйг дээд зэргээр барьдаг. Энэ нь манай байгууллагын удирдлагын төвшинд их нөлөөлөл үзүүлсэн. Анхнаасаа суурь нь зөв байсан компани нэлээд амжилттай ажиллаж ирсэн.
-Та мэргэжилдээ үнэнч хүн байх нь.
-Би үнэхээр мэргэжилдээ үнэнч. Энэхүү мэргэжлийг эзэмшсэндээ одоо ч баярлаж явдаг.
Электроник, холбооны инженер хүн ямарч нийгэм, цаг үед амьдарч болдогоороо онцлогтой. Би өмнөх нийгмийн үед ч мэргэжлээрээ боломжийн сайхан амьдарч байсан. Зах зээлд шилжсэн ч улс төрөөс хамаардаггүй мэргэжил. Мэдээллийн технологи дэлхий даяараа асар өндөр хөгжиж байгаа иймээс мэргэжлээ сольж болих ямар ч шаардлагагүй.

Зарим нь удирдах ажил амаргүй гэдэг ч та энэхүү төвшинд нэгэнт хүрчихсэн ажиллаж байна шүү дээ. Энэ хүртэл дэвшихэд хамгийн чухал нь...

-Сүүлийн 14 жил удирдах ажил хийж байна. Гол нь хүнтэй ажиллах чадвар л даа. Үүнийгээ л хүн хөгжүүлэх ёстой. Би Удирдлагын академид суралцаж, 2001 онд анхны бизнес удирдлагын мастераар төгсч байлаа. Тэр нь надад маш их хэрэг болсон. Хүмүүсээр ажил хийлгэж, бизнесийнхээ зорилгыг биелүүлэх нь хэцүү. Хүмүүсийнхээ дунд хүлээн зөвшөөрөгдөх, үлгэр жишээ болж явах, өөрөө санаачилгатай, дороос гарч байгаа ажилчдынхаа сайн санал, санаачилгыг дэмждэг, тэдэндээ урам зориг, эрч хүч өгч сургадаг, мөн тэднээсээ сурдаг сайн харилцаатай байх ёстой. Монгол Улсын хувьд цөөн хүн амтай зэрэг бизнесийн онцлог бий л дээ. Тиймээс манай улсад бизнес бие биеэ сайн мэддэг цэвэр харилцаан дээр тогтнодог.

Таны хувьд чадварлаг удирдагч гэж хэнийг хэлэх вэ. Зарим судалгаагаар чадвар муутай удирдагч ажилчдаа зүрхний шигдээстэй болгодог гэдэг.

-Өөрийгөө эхлээд хөгжүүлж, хүмүүжүүлэх хэрэгтэй. Өөрөө боловсрогдож бэлтгэгдээгүй хүн бол хэчнээн том албан тушаалыг аваад амжилттай ажиллахгүй шүү дээ. Манай ард түмэн агуу ухаантай. Эхлээд биеэ зас, дараа нь гэрээ зас, тэгээд төрөө зас гэж дарааллыг нь хэлчихсэн. Сайн удирдагч болж, амжилттай бизнес эрхлэхийн тулд өөрөө эхлээд өндөр төвшинд бэлтгэгдэх ёстой. Түүнээс биш ямар нэгэн лоббигоор юм уу, албан тушаалыг худалдаж аваад амжилт гаргана гэж хэзээ ч байхгүй.

Өглөөг яаж эхэлдэг вэ?

-Өглөө аль болох эрт, ер нь 06-07 цагт босчихсон байдаг. Өглөө эрт ном уншдаг, заримдаа олон улсын мэдээ харна. Уншиж судлах зүйл улам л их болоод байна. Олон ном авчихсан, интернэтээс хэрэгтэй зүйлээ бэлдээд тавьчихдаг юм. Өөрийнхөө чадварыг хөгжүүлж, арвижуулахад цагаа зарцуулдаг. Тэгэхгүй бол дорхноо хоцрогдоно шүү дээ. Шинэ мэдээлэл, шинэ арга технологиос жаахан хөндийрөхөд нэг мэдэхэд ийм байдалд хүрнэ. Тиймээс сайн бизнес хийхийн тулд их ажиллах, олон зүйлийг мэдэж, олж авах шаардлагатай болдог. Хэн нь их мэдээлэлтэй байна, тэр хүн л бизнес шийдвэрийг шуурхай гаргана. Ажил их гээд авьяас чадвараа хөгжүүлэх, сурч мэдэхээ хойшлуулж болохгүй. Эрүүл чийрэг байхын тулд спортыг мартдаггүй, заавал хэдэн минут хичээллэдэг. Тэгээд өглөөнийхөө цайг уучихаад ажилдаа ирдэг.

Үгүй ээ, ингэхэд бизнес,спорт хоёр ямар холбоотой гэж?

-Удирдах ажил хийдэг хүнд байх ёстой хамгийн чухал нэг зан чанар бол спортлог байх юм. Мэдээж хэрэг заал хэсээд хамаг цагаа өнгөрөөнө гэсэн үг биш л дээ. Тодорхой цагийг зардаг байх хэрэгтэй. Тэр хэмжээгээр эрүүл мэнддээ хөрөнгө оруулалт хийнэ. Хамгийн гол нь бизнесийн шийдвэр хурдтайгаар зөв ?ардаг юм. Спортоор хичээллэдэг, хичээллэдэггүй хүн хоёрын хооронд их зөрүү байдаг. Хичээллэдэггүй хүмүүсийн хувьд болохоосоо илүү болохгүйг нь бодоод, хэтэрхий зориг муутай аашилдаг. Спорт өөрийгөө давж дийлэх, энерги идэвх, эрч хүч авах хамгийн гол зүйл төдийгүй бизнесмен хүний амралт. Тиймээс би зав л гарвал явган явдаг болоод зайгаа. Хөдөлгөөн сайтай болохоор нь заалны спортоос бадьмингтон нэлээд тоглодог. Сүүлийн үед боулингийн клубт явж байна.

Ширээний номоо ямар шалгуураар сонгосон бол?

-Миний хайртай ном "Амьдралын алтан ном". Дандаа ялж дийлээд баяр баясгалантай байхгүй шүү дээ. Ядрах, ялагдах, урам муутай байх үед тэр номоо уншдаг. Их сайхан ном л доо. Үүнээс гадна зөндөө олон ном бий. Ихэвчлэн менежментийн чиглэлийнх. Ажилтнуудаа яаж сэдэлжүүлэх вэ гэдэгт би их анхаардаг. Тэдэндээ ажиллах эрч хүч, урам зориг өгөх, хооронд нь илүү сайн хамтарч ажиллуулдаг болгох, оролцоог нь нэмэгдүүлэхийн тулд би иймэрхүү чиглэлийн номыг түлхүү уншиж судалдаг юм.

Хамгийн сүүлд ямар ном худалдаж авсан бэ?

-"Өрсөлдөөний стратеги" гэдэг орчуулгын ном авсан. Их сайн ном байна лээ.

Хувь хүний хөгжил, менежмент, стратегийн номыг их уншдаг гэлээ. Ингэхэд та ер нь өөрийгөө ялж чадсан хүн мөн үү?

-"Өөрийгөө бүр мөсөн яллаа” гэж хүн хэзээ ч хэлж болдоггүй. Орчин үед хүн өөртөө л дайсан болж байна. Ямар наган байдлаар хүв өөртөө ихэвчлэн ялагдах гээд байдаг. Өнөөдөр хийх ажлыг маргааш болгож хойшлуулах нь ялагдаж байгаа нэг хэлбэр шүү дээ. Төлөвлөсөн зүйлээ тасалдуулдаг. Хүн бүхэн төгс болж чадахгүй ч аль болохоор өөрийгөө ялахын төлөө хичээх хэрэгтэй. Би ийм л зарчмаар явдаг.

Та ялагдлаасаа хамгийн их сургамж авч байсан үе нь хэзээ бол?

-Бүр их айхтар ялагдал хүлээж байгаагүй. Сайхан хамтаа олон, сайн байгууллагын хүчээр ихэвчлэн амжилттай өсч ирсэн. Өнгөрсөн оны хувьд бид хямралаас үүдэлтэйгээр бизнесийн зарим зорилгоо биелүүлж чадаагүй зүйл бий. Хатуу хүнд нөхцөлд ажиллах чадвар туршлага дутлаа даа л гаж ойлгож байгаа. Өөрөөр хэлбэл, өрсөлдөгчдөө ялагдаагүй, өөртөө ялагдсан. Өнгөрсөн жил алдчихлаа гэхэд үүнийгээ энэ жил яаж нөхөх вэ гэдгээ бодож төлөвлөөд нэлээд ажлыг амжуулж байна. Тодорхой хэмжээний үр дүнг нь амсч эхэлсэн.

Дэлхий хямарснаас биш Монгол хямраагүй гэж зарим нь үздэг. Ер нь 2009 онд юу болоод өнгөрчихөв өө?

-Маргах хэрэггүй. Дэлхий даяараа л хямарчихсан. Харин Азийн хямралыг бид мэдрээгүй өнгөрч байлаа. Дэлхий улам бүр даяаршиж байгаа нь өнгөрсөн жилийн хямралаас харагдана. Хөгжингүй орноос үүдэлтэй хямрал бүх дэлхийг хамарч, эдийн засгийн олон салбар зогсолтод орлоо. Олон компани ажлын байраа цомхотгон бизнесээ өргөтгөж чадахгүй болж царцчихсан. Мэдээлэл, холбооны бизнес харилцагчийн эдийн засгийн боломжоор хэмжигддэг,. Хямралын үед мэдээж хүмүүс хэмнэж эхэлнэ шүү дээ.

Тэгвэл хямрал өнөөдөр дууссан уу?

-Болоогүй, өнгөрсөн жилийн хямрал энэ жил ч үргэлжилж байна. Хямрал дуусна гэдэг нь хүмүүс ажлын байр, орлоготой болж, эдийн засгийн салбарт бүгдээрээ хэвийн ажиллагаанд орохыг хэлнэ. Манай эдийн засаг жижигхэн дээ. Хоорондоо учраа олоод, улс төржөөгүй бол дорхноо хөл дээр босчихно. Тэр газар нутаг дээр их баялагтай бид азтай ард түмэн. Түүнийгээ л зөв зарцуулчихвал Монголын эдийн засаг сэргэх нь амархан.

Манай улсад бизнес нь улс төртэйгээ, улс төр нь бизнестэй холилдчихсон. Ингэхээс аргагүй гаж зарим нь мэлздэг. Харин таны хувьд арай өөр бодолтой байх шиг?

-Бид төвийг сахьсан байр суурьтай. Ямар нэгэн улс төр, эдийн засгийн бүлэглэлд ордоггүй. Хамгийн зөв бизнесийн соёлыг л Монголдоо нэвтрүүлнэ. Бизнесийг эхнээсээ зөв хийх нь манай хөрөнгө оруулагчдын алтан дүрэм. Зах зээлд дөнгөж хөл тавьж байгаа компани эхний үед орлого ашгаа нууж алдах гээд байдаг гэмтэй.

"Ажил, орлоготой болоод цагт хямралаас гарвал гаж та хэллээ Хямраагүй байхад ч ажил олгогч, ажил хайгчийн хооронд нэг нь голдог, нөгөө нь цалингаа чамладаг ая цав үүсчихсэн л байсан шүү дээ. Бид энэ байдлаас яаж гарах вэ. Боловсролын тогтолцоог өөрчлөх үү, эсвэл таны хэлдгээр хувь хүв өөрийгөө л хөгжүүлэх ёстой юу?

-Зах зээлийн нийгэмд засаг төрөөс км нэхэхийн оронд хүн эхлээд өөртэйгээ л ажиллах ёстой. Бүх зүйлийг дээрээс авчихна гэж бодвол түүн шиг худал зүйлгүй. Өөрийнхөө авьяас чадварт таарсан ашиг орлого хийх бололцоог зах зээлийн нийгэм илүү олгодгоороо давуу талтай. Энэ сэдвийг хөндөхийн тулд олон зүйлийг ярихаар байна л даа. Нэгдүгээрт, өөрсдийгөө нээж харуулахгүй байна. Ялангуяа залуу байхдаа өөрийнхөө үнэ цэнийг бий болгооч гэж би байнга хэлдэг. Үнэ цэнэ гэдэгт мэдлэг боловсрол, дадлага туршлага, зөв төлөвшилтэй, хаана ч очсон, хэнд ч өөрийгөө цөөн үгээр зөв таниулж чаддаг, ажлаа үнэнч шударгаар хийдэг байх хэрэгтэй. Зах зээл хөгжсөн аль ч улсад мэргэжилтэн гэхээсээ илүү ийм л зүйлийг шаарддаг. Хэр зэрэг итгэлтэй байна, тэгээд хэр зэрэг төлөвшилтэй байна, эцэст нь хэр зэрэг ур чадвартай байна гэдгийг хардаг болжээ. Боловсролын систем рүү бүх бурууг чихэж болохгүй. Хүн суръя гэвэл бүх боломж байна шүү дээ. Ний нуугүй хэлэхэд жаахан залхуу байна. Би дотоодод төгссөн ч сургууль, мэргэжлээрээ бахархдаг. Одоо залуучууд маань жаахан хичээх хэрэгтэй. Төлбөр төлж сурах тусмаа хариуцлагатай болох ёстой шүү дээ.

Орчин үеийн төлөвшсөн залуу хүнийг та тодорхойлбол?

-Өөрийгөө болон өрх гэрээ тэжээж тэтгэх чадвартай байх хэрэгтэй. Заавал дээд боловсролтой, олон хэл мэддэг, мастер зэрэгт байвал сайн хийж сур. Түүнийг чинь үнэлнэ. Өнөөдөр сайн техникч, дархан, мужаан хэрэгтэй байгаа. Гэтэл болсон, болоогүй дээд боловсролын диплом авсан мэргэжлийг голох хандлага ажиглагдаад байх юм. Тааруухан ашиг муу ажил гэхээсээ илүү өөрийнхөө чадах ажлыг л сайн хийчих сэтгэлээсээ хүнийг хуурахгүйгээр тухайн ажил мэргэжлээрээ өөрийгөө хөгжүүлж дадлагажуулаад өгөөч. Эцэстээ өндөр цалин авахын тулд өндөр чадвартай байх хэрэгтэй. Ямар ч асуудал шийдвэрлэх чадвар туршлагагүй байж цалин голоод явах нь утгагүй. Түүний оронд өөрийнхөө сул талыг олж, дадлага туршлагаа хөгжүүлээд нэг хэсэгтээ бүсээ чангалчихвал дараа нь тэр хэмжээгээр л олдог. Ингэхгүй бол нэг л мэдэхэд өрсөлдөх чадваргүй бодчихсон байна шүү дээ. Насан туршдаа хүн ажил, ашиг орлоготой, хүнд гологдохгүй, эрүүл чийрэг байх ёстой. Хүн гол үнэ цэнээ залуу насандаа л бий болгодог юм. Үнэ цэнэ гэдэг чинь мөнгө шүү дээ.

Танай компани сайн менежментээрээ хэрэглэгчдээ татаж чаддаг. Үүний зэрэгцээ Мобиком олон жил орлого ашигтай ажиллаж байгаа юм чинь одоо үйлчилгээний төлбөрөө хямдруулж болдоггүй юм уу" гэж олон үйлчлүүлэгч асууж байгаа нь ажиглагддаг. Энэ талаар та нарт төлөвлөсөн зүйл бий юу ?

-Харилцаа холбоог зохицуулах хорооноос биднийг хянадаг. Манайх тарифаа хамаагүй бууруулбал өрсөлдөгчид маань хүнд байдалд орно шүү дээ. Тиймээс бид хяналттай байдаг. Гэхдээ зарим үйлчилгээний тариф өрсөлдөгчидтэйгээ адил төвшинд байгаа. Өнгөрсөн онд манайх хэрэглэгч төвтэй байгууллага болсон. Нөгөөтэйгүүр, энэ нь том хариуцлага. Удахгүй манайх ISO-9000 стандартыг нэвтрүүлнэ. Ингэхээр бүтээгдэхүүн, үйлчилгээ маань олон улсын төвшинд хүрч,өрсөлдөх чадвартай болно гэсэн үг. Монголын олон компани бидний араас ингэж явах байх.

Ярилцлагынхаа төгсгөлийн асуултыг танд үлдээе.

-Монгол хүн өөрийгөө битгий голооч. Бусдаас хоцорсон, доогуур төвшнийх гэж бүү чамлаач. Чадна шүү дээ. Жаахан хичээчих. Бүгдийг нь хийж чадна. Бизнес эрхэлж байгаа хүмүүсийг ажиглахад барууны шилдэг менежментийг авч хэрэглэх нь дутагдаад байна. Хуучнаараа л яваад байж болохгүй. Бизнесийнхээ зорилтыг тодорхойлж, хэмждэг, бүтээмжийг дээшлүүлдэг гээд олон арга хэрэгсэл бий. Тэрийг хэрэглэж болдог юм. Бид олон жил туршиж, үр дүнг нь үзсэн болохоор үүнийг бардам хэлж байна. Бид бүгдээрээ л сайн байж, ижил төвшинд очсноор хувь хүн, улс орон хөгжинө шүү дээ.
Г.Ганчимэг
ganchimeg@zmail.mn

ICTPA улам залуужиж байна

2010-05-02T03:29:01Z

Манай салбарыг тэргүүлэгч гол Төрийн байгууллага болох ICTPA буюу Мэдээлэл Шуудан Харилцаа Холбоо Технологийн Газар хэмээх унжралдсан урт нэртэй газар маань улам залуужжээ.

Уул нь монголын хамгийн ирээдүйтэй салбарыг удирдаж байгаа боловч гол хөдөлгөгч хүч нь болох оюуны хүчээр бүтээгдэхүүн үйлдвэрлэх хэсэг нь олигтой урагшилж өгөхгүй байгааг та бид мэднэ. Гэхдээ салбарын дэд бүтэц бол тун дажгүй хөгжиж байгаа. Өргөн уудам монголын тал нутгийг бараг бүхлээр нь шилэн кабелиар холбож, сум болгонд гар утасны аль оператор орж холбоо харилцааг хүргэж чаджээ. Бас айл болгон хямд үнээр компьютер, бас интернэт авах бололцоо нэгэнт бүрдсэн байна. Харин энэ жилээс эхлэн агуулга болоод програм хангамжийн хөгжлийг анхаарч эхэлсэн нь олзуурхууштай. Удахгүй бид тун дажгүй програмуудыг үзэж эхлэх биз ээ.

Уг газрыг анх байгуулахад одоогийн УИХ-ын гишүүн Ч.Сайханбилэг толгойлж байсныг та мэдэх байх. Тэгээд энэхүү давуу талаа ашиглан 2008 оны УИХ-ын сонгуульд нэр дэвшин ялалт байгуулсан. Нэр дэвшихдээ баримталсан гол бодлого нь монголын нутаг дэвсгэр дээгүүр Хятад Оросыг холбосон шилэн кабель татан урсгалаас нь татвар авах тухай байсан билээ. Нүдэнд харагдтал сайхан ярьж, мангар хүн ч ойлгохоор мундаг видео үзүүлэн бэлтгэж 30 гаруй минут ярьж байсныг та санаж байгаа биз ээ. Ялангуяа Англид байгаа хатагтай Смит, Сингапурт байгаа ноён Литэй холбогдоод ярихад монголд зоосон мөнгө унаж байгаа хэсэг нь сэтгэлд тод үлдэж дээ. Харин энэ талаарх ажлыг нь Газартаа үлдсэн хэсэг нь хийж байгаа гэж найдъя.

Харин ноён Сайханбилэгийг салбарын биш улсын бодлого тодорхойлохоор явахад түүний орыг улам залуу хүн буюу Ж.Сансар гэж залуу авч үлдсэн. Сансар бол яах аргагүй мэдээллийн технологийн салбарын хүн бөгөөд өмнө нь Нийслэлийн Мэдээллийн Технологийн Газрын даргаар ажиллаж байсан юм.

Харин саяхан орлогч даргаар нь А.Мөнхбат сонгогджээ. Мөнхбат бол одоо 30 гаруй насны шилдэг боловсон хүчний нэг юм. Ингэснээр уг Газар маань монголын хэмжээнд магадгүй хамгийн залуу дарга нартай Газар болж байх шиг байна.

Залуу тоглогч нартай хөлбөмбөгийн багт туршлага дутах байдал ажиглагддаг ч эрч хүч, хурд гэсэн чухал давуу тал байдгийг та бид мэдэх билээ. Ингэснээр манай салбарын хурд нэмэгдэх бололтой.