КТ.мн

Уг сэтгүүл нь дараах шинж чанаруудтай:

1. 60 өнгөт нүүртэй
2. Сард 1 удаа хэвлэгддэг
3. Програм хангамж, Кино, Өгөгдөл бүхий DVD дагалддаг
4. Өндөр чанарын сайн цаасан дээр хэвлэгддэг
5. А4-ээс ялимгүй жижиг (210*285мм)

Тус сэтгүүл дээр реклам тавих гэрээ хийсэн байгууллагууд рекламаа бэлтгэхдээ дараах зүйлсийг анхаарвал тун сайн.

1. Уг сэтгүүл нь бүтэн өнгөтөөр гардаг учир аль болох цагаан дэвсгэр өгөхөөс зайлсхийх хэрэгтэй. (Хэрвээ цагаан бол ямар нэгэн өнгөөр хүрээ өгөхийг санал болгож байна.) Бусад нийтлэлүүд бүгд цагаан дэвсгэртэй байдаг тул реклам нь өөрөө сэтгүүлд хурц өнгө төрх, чимэглэл нэмдэг чухал элемент юм. Маш гоё рекламыг хүмүүс алмайран харах ч тохиолдол бий.
2. Маш өндөр чанартай хэвлэгддэг тул нарийн детальчилсан элементүүд ашиглавал цэвэр үзэмжтэй сайхан гарч чадна. (Градиент буюу уусалттай өнгө, Нарийн ирмэг бүхий дүрсүүд ашиглах гэх мэт)
3. Тухайн рекламаа тохиромжтой зураг, дүрслэлээр баяжуулвал зохино. Мэдээж ашиглах зураг, график нь өндөр нягтралтай (250 dpi-аас доошгүй) байх ёстой. Зургаар баяжуулаагүй рекламыг уншигч хүн шууд алгасах магадлал өндөр.
4. Реклам тань CMYK өнгөний горимоор хийгдсэн байвал тун сайн. Энэ тохиолдолд хар үсгээр бичигдсэн текстийг RGB-ийн хараар биш CMYK-ийн Kernel-ийн дан хараар бичвэл тун зүгээр байдаг. Энэ тохиолдолд өнгө зөрөлт гарахгүй бөгөөд текст тань хурц, тод хэвлэгдэх болно. Үүнийг зөвхөн туршлагатай компаниуд л хэрэгжүүлдэг. (MCS, Tedy, BSB-ээс ирдэг рекламууд CMYK-тэй яг ийм маягаар хар текстээ бичсэн байдаг нь тэдний дизайнерууд ихээхэн туршлагатай болохыг харуулж байгаа юм. Танайх ч гэсэн ялгаагүй ийм байлгах боломжтой.)
   
5. Заримдаа брэндээ сурталчилсан, заримдаа нарийн мэдээлэл өгсөн, заримдаа ерөнхий компаниа амьд гэдгийг сануулсан гэх мэтээр рекламынхаа имидж, зорилгыг өөрчилж байвал зүгээр.
6. Амьгүй зүйлсийн дүрслэлээс илүү амьтай зүйлийн  зураг хүний анхаарлын татдаг. (Жишээ нь дан компьютерийн фотоноос илүү ардаа хүний зурагтай компьютерийн фото байвал зүгээр гэсэн санаа)
7. Зурмал эсвэл хийсвэр зургаас илүү фото зураг хүний анхаарлыг татдаг.
8. Ямар ч тохиолдолд эмэгтэй хүнийн фото нь моодноос гардаггүй. Эрэгтэй, эмэгтэй хүнийн зураг байлаа гэхэд бүгд эмэгтэй хүнийг түлхүү хардаг. Тэр эмэгтэй нь өвөрмөц байх тусмаа л ЗААВАЛ ОНЦГОЙЛЖ ХАРАХ гэдэг баталгаа нь нэмэгдэнэ. Таны рекламыг хүмүүс харж, ярилцаж л байвал аль алинд маань хэрэгтэй биз дээ!
9. Хэрвээ танайх реклам тавих байнгын гэрээтэй бол лого, өнгө, байрлал, фото модель, (тэдгээрийн байрлал, өнгө) гэх мэтийн шинжээр бусдаасаа ялгарч, энэ онцлогоо байнга хадгалбал зохимжтой.
10. Бид нэгэнт батлагдан ирсэн рекламанд өчүүхэн ч засвар оруулах эрх байдаггүй учир та рекламаа дуусгасны дараа заавал бүтэн уншиж хянаж үзнэ үү.
11. Үг үсгийн алдааг онцгойлон анхаарвал зохино.
12. Текст болон тайрагдаж болохгүй чухал элементүүд ирмэгээс дор хаяж 10 мм-ээс дотогш зайд байрлах ёстой. Тэгэхгүй бол хэрчилтэд орох аюултай. Зарим компаниуд эхээ бэлтгэхдээ текстийг ирмэгт хэт тулгаж бичсэн байдаг нь болохгүй гэсэн үг.
    
13. Рекламандаа онцгой анхаардаг газрууд 2-оос доошгүй реклам зэрэг бэлтгэж өгөх нь бий. Бид тэндээс нь сонгон тавьж болох юм. (Энэ хэсгийг алгасаж болно. Үүнийг манайд биш гэхэд дотооддоо хэрэглэвэл их зүгээр байдаг.)
14. Сэтгүүлийн тухайн дугаар бүтэн жилийн турш үнэ цэнээ алдалгүй амьд байдаг. Иймээс зөвхөн цаг зуурын мэдээлэл бүхий сурталчилгааг бодвол удаан хугацааны туршид хүчинтэй байх сурталчилгаа нь үр дүн ихтэй.